من ديوان الشاعرة عابرة سبيل

ديوان الشاعرة عابرة سبيل

مقدار حبي

&&&&&&&&&&&&&&&&&&&&&&

لــــــــــــعــيــونـــه

جاني يقول : اسمعي لابد نتباعد
"""" ياخوك ماعاد به حل يريدونه

حسيت باحساس ماحسه معي واحد
"""" حسيت باحساس مدري كيف مضمونه

غربة سليمان وتلقائية مساعد
"""" وصرخة سلامه .. ونايف صقر بجنونه

ياهمي اللي معايه قايم وقاعد
"""" من وين مادرت وجهي قيل مديونه

لولاك ياحشمتي للوجه والساعد
"""" يمديني من قو غيضي صرت ملعونه

أقدر أغني وأدق طبول وأواعد
"""" لكني أرغب أقضي العمر مصيونه

أبسطها آخذ جوازي وأجحد الجاحد
"""" وآخذ شليلي بفمي وأقول : لعيونه

&&&&&&&&&&&&&&&&&&&&&

نـــــــــون

هو يعرف أن القصايد خيالات وفنـون
واقعي مافيه غيـره شريـك بدنيتـي

مالعبوا اهل المغازل عليه ويخسـون
ماشيه في حشمةاللي مشى في حشمتي

من تربي مثلي فبيت عزٍ مايخون
غاليه بالحيل بالحيل عنـدي سمعتـي

ماسهرنـا بالليالـي ندقـدق تليفـون
امحشوم اللي نواه الجليـل بقسمتـي

غالي لو هو يبي قصة العاتـق يمـون
حجته تبقـى وتسقـط لعينـه حجتـي

هو نون وحطه المعتلي في وسط نون
في يدينه دمعتي وفي يدينـه بسمتي

&&&&&&&&&&&&&&&&&&&&

:: آخـذ الدفتـــر ::

كل ماقالو لفا الديره 00 غريب

قمت أومي في يديني وابتهل

هيه يالمقبل هلابك يالحبيـــب

مرحبا وأهليـــــن ياحي الرجل

وإن تــــبين لا صحيب ولا قريب

أبكي ضيقة أبكي حره وأنفشل

وأعتذر في صوت قطعه النحيب

العــذر والله رحل عنـــــي طفل

وأكتـــــب التاريـــخ وأوقع صليب

وآخذ الدفتر معايه 00 وانـــعزل

&&&&&&&&&&&&&&&&&&&&&

يتبع

ياعنتــــــر

لـي صاحب منه تبـي تطلع الروح
خبل ومن هي مولعه فيه خبــله

عاميــن المح له مع الجد ومزوح وأقول ياعنتــر تنـاديك عبلة

طال المدى ثم قلت أنا أغليك يالوح
مجروحة جرح جرح مخاطره عجله

دنق وقال أنا من العام 000 مجروح
وأشـر لجرح مبطــــي وسط رجله

&&&&&&&&&&&&&&&&&&&&&&&

)(طيري)(

طيري غدا بين هالغربــان !!
يــامن يـدور على طيــري !!

في ساعة خاطري زعلان !!
بيــــدي سلمته لغيــــري !!

ماهـوب غضب ولا حقـران !!
يـــا للأسف ضاع تفكيـري !!

ما جابه الخاطر النـــدمان !!
ولا انـــفعني معاذيــــري !!

لو إنـــــه مخلي العنـــوان !!
والله لاوريـــه تقديــــــري !!

&&&&&&&&&&&&&&&&&&&&&&&

صبحيه العيد

ليــته درى صبحيه العيد وش صار = يـاهي جرت لي من عذابي هوايل

يوم الــعذارى بيحن بعض الاسرار = وجت الــسوالف بين قيل وقايل

هذي مـــعايدها قبل وقت الاسحار = وهذيك صاحـــبها عطاها رسايل

وهذي تـقول انه لفا البيت زوار = وهذيك راحت له زيــاره عوايل

وهذي تفاخر في غلا الصاحب البار = تــقول عايدها بكل الوســايل

وانا اطالع فوق ويـــمين ويسار = بالعـــيد ماحتي مشطت الجدايل

&&&&&&&&&&&&&&&&&&&&&&&&&&&

مهره الشوق

جيــتك من الفرحه على مهره الشوق = تسبقـــني الـخطوة على الدرب قدام

جيـــتك ولا ابالي ولو يطلع العــوق = جيتك وانا شــوقي مــــــوزعني اقسام

لا..لا تـــهمك ناس مــاتعرف الذوق = يـــسرون تـال اللــيل والصـبح صيام

ياعم لا مــنطق ولا فيــــه منــــطوق = بعها ، تراني .. بايـــــــعتها للاعدام

اخذ الرطب قول النــخل يتمر عــذوق = خــيب رجا اللي يرتـــجونه من العام

واضرب على الكايد ان ماجاب برفوق =مليــت انا ويــاك من عــــــدم الايام

&&&&&&&&&&&&&&&&&&&&&&&&&

ياصاحبــي

ياصاحبــي ... بس تكفـى ... لاتجنــنــي
ما عفت من ضرنـي .. وشلون خلانـــي ؟؟

حتــى الذي ضرنــي ... لا ضاق يحزنــي
ماعندي أعداء ، كـل النـــاس صدقانــــي

قلبــي معاكم نظيف وصافــي ظنـــــي
لا مايتغيــر غـلاك إن صرت ... غلطانــي

والله لا سامح الغلطة وأنــــا ... أغنـــي
من لاعذر صاحبـه يعيش ... وحدانـــــي

وإن كان قلبــي حقود ... الله يـــلعنــي
وإن كان مالـي شرف ... عساي للفانــي

&&&&&&&&&&&&&&&&&&&&&&&

حيرة

لا..قال ردي لي ولا.. قال روحــي = لا .. هو مريــحني ولاهوب مرتاح

يــغيب ويــعود يفـــــــتق جروحي = واذا استجــــد الجرح لوح لى وراح

واضحك واجامل وادعي بالفروحي = وبـداخلي نار.. وتجـــاريح وصياح

واحــاول اخـــفي جروحي بروحي = واخيــط جرح وتنـــفتق عده اجراح

وان قــربت دمعات عيني تفــــوحي = الله اكــبر ، صـــار لي قلب مزاح

&&&&&&&&&&&&&&&&&&&&&&&&&

يتبع

آخر مـــــوعـــد

له موعد لاروح الليل وياي
أول وآخـــر موعــد مع فتاتــــه

اليوم ما تنفع دموعي ورجواي
اليوم تفصل عن حياتي حياتـــه

اليوم يعطيني بقايا بقاياي
واعطيه انا ماشلت من ذكرياته

اليوم بابدل مشاعر حناياي
يصبح من اخواني وانا من خواته

اليوم يتركني لحالي بدنياي
مجبور يــــقفي لو يزيد التــــفاته

اليوم يخلف عن مماشيه ممشاي
والله ما أضمن من عذابه نجاتــه

لو اتعلق فيه ما ينفع ابكاي
خلاص فات الوقت واعلن فواتـه

اليوم بعطيه العزا عقب فرقاي
عندي خبر وش قيمتي في حياته

وانا العزا مابيه من كبر بلواي
ماينفع اللي عاش واعلن وفاتــه

يارحمة الله ساعديهم بسلواي
يعوضه الله بانكسار امنياتــــــه

اليوم ياهمي وياطول مسراي
يافرحة العذال وأهل الشماتــــه

&&&&&&&&&&&&&&&&&&&&

يادنياي

جيت بكتب عن شقا عمري قــصيده =مــير عيـــــــــــا القول لا ياقف معي

شاف همي والــمعاناه الشــــــــديده = اكــبر من القــــــول وحروف النعي

هــاك يــادنيـاي عمري ماريــــــده = اضربيـني واقسمــــــيني واجمعي

اي نعم ماني بها الدنيا ســـــــــعيده = مـــن نهـار ولادتي وهمــــــي معي

عــشت مـحزونه وملتاعه وشــريده =وياكـــبـــــر شــي تخبيه أضلعي

مــابي بين الناس تبكــــين وحــــيده = وان هجــع طرف البشر ماتهجعي

امــا مـوته حق او ايــــــدي بايــــده =هــــــيه يارحمه الهي .. اسرعي

&&&&&&&&&&&&&&&&&&&&&&&&&

البطاقه الشخصيه

أنا عجوز مطلـــقة وام ورعـــــــان
وأيضاً مدام وبنت وآنس وعانـــس

أنا بدوية وعايشه عند حضـــــران
وبنت البحر أبـــوي زارع وغارس

أمية ماتعرف حروف وألــــــــــوان
وتلميذة دشت جميــــع المدارس

ضفره وخبله ، عاقله،في نقصان
شرود وأنطح لي ثمانيـــن فارس

خلونِ أعيش العابره دون عنـــوان
طــــــيف يمر بلا رقابـــــه وحارس

&&&&&&&&&&&&&&&&&&&&&&&

سنــــين

سنــــين مامرت علومه عليّـــــه
لا علم لا طاري ولا من مكاتيــب

سنين في صبــري وحالي رديه
بين المحاتى وانتظاري وتعذيــب

لا ليل .... لا فرحه.... لادنيا هنيه
يعلم بــــحالي واحد يعلم الغيب

انــــا ان تحريـــت اتـــصاله عليّه
دقات قلبي ضربها ينفض الجيب

ولو دندنــــت أساوري في يديه
اضم انا الهاتف واهل التراحيب

ابا انطره وابقـــى ببعده وفيـــه
وارفض على شانه جميع الخواطيب

&&&&&&&&&&&&&&&&&&&&&&

ضايقه

ضايقه بالحيل محتاجه اشتكي
لولا طبع فيّ .. يمديني شكيت

بس أدور عذر منشان البـــكي
لو يدوسون بطرف ثوبي بكيت

كل ماجيــــت اتريـــــح وارتكي
يزدحم في خاطري الفين بيت

ويش بيدي افعله غير الحكي؟
قاصره خطوات رجلي لو مشيت

أسرعي يانفس موتي واهلكي
صرتي همي يوم بالدنيا شكيت

&&&&&&&&&&&&&&&&&&&&&&&

إنـــا لــلــه
لـيـتـنـي الـبـارحـه يــا نـايـفــه مــا سـريــت
يــم درجٍ مـقـفــل مـــن قــديــم الـسـنــيــن
أشـهـد انـي فـتـحـتـه و انـتـحبــت و بـكـيــت
شـفـت مـا هـيـض الـجــرح الـقـديــم الـدفـيــن
شـفـت وسـطـه رسـالـه و لـيـتـنـي مــا قـريــت
بـيـت شـعـرٍ قـديــم و ظــرف مــع صـورتـيــن
أشـهـد انــي لـغـيــره بـالـغــلا مــا عـطـيــت
و اشـهـد انـه بـغـانـي مـيــر مــا مــن عـويــن
صـحـت مـن قـلـب يـا ويـلـي عـلـى الـلـي هـويـت
و قـمـت امـسح دمـوعـي مــن يـســار و يـمـيــن
لا طـرالـي حـبـيـبـي بـصــوت واطــي حـكـيــت
إنـــا لــلــه وإنـــا لـلــولــي راجـمـعــيــن

&&&&&&&&&&&&&&&&&&&&&&

لحظة وداع
فارقـت خلـي و كـلٍ ودع الثانـي
لا عـادك الله يـا فرقـا المحبينـي
في ليلـة السبـت خليتـه وخلانـي
يا ليلة السبت جعلـك مـا تعودينـي
الصاحب اللي عقب مـاراح بكانـي
و هو بعد قبل مـا يمشـي مبكينـي
سابع سنة حبهم عايـش بوجدانـي
طموح و احلام ماتن ، من يعزيني ؟
و الله مدري انا ابكي بعـد خلانـي
و لا على عمري اللي راح وسنيني ؟
عنده رقم هاتفي و اسمي وعنوانـي
ان غير الوقت رايه 00 يتصل فيني

&&&&&&&&&&&&&&&&&&&&&&

ش اقول له

باكر يجي 00 يا شيب عيني من الويل
من عقب مـا سافـر سنيـنٍ مديـه
ش اقول له 00 صاروا عيالي رجاجيل
ش اقول له ؟ 00 ماني بعهده وفيه ؟
إن قلـت لـه إنـي تعذبـت بالحيـل
و إن قلت لـه أكبـر عيالـي سميـه
يبي يعذرني و يتـرك القـال والقيـل
و لا يجـي ويـا زمـانـي علـيـه
و ان جبت حظي و المقادير 00 تعليل
و اني ضعيف 00 و رغبة الله قويـه
يبـي يصـدق كلمتـي دوم تحلـيـل
و لا يبـي ينسـف كلامـي عليـه ؟
ش اقول له ؟ 00 ما ينفعن الاقاويـل
ما دمت مانـي فـي وعـودي وفيـه

&&&&&&&&&&&&&&&&&&&&&

قائلة :

ترى الذبايح واهلها ماتسلينى === وانا ادرى ان المرض لا يمكن علاجه

ادرى تبى راحتى لا يابعد عينى === حرام ما قصرت ايدك فى حاجه

اخذ وصاتى وامانه لا تبكينى === لو كان لك خاطر ماودى ازعاجه

اابيك فى يديك تشهدنى وتسقينى === وامانتك لا تجى جسمى فى ثلاجه

لف الكفن فى ايديك وضف رجلينى === ماغيرك احد كشف حسناه واحراجه

ابيك بالخير تذكرنى وتطرينى === اجيرنى خالقى من نار وهاجه

سامع على ماجرى بينك وبينى === ايام امسى عدل وايام منعاجه

عيالى همى وانا اللى فينى يكفينى == علمهم الدين تفسيره ومنهاجه

» الفنانة الشاعرة والكاتبة سوسن سيف
» قمر الغياب.........الشاعرة التونسية جميلة الماجري
» ديوان ما بعد الرحيل .." أبجدية الياسمين "